من حور الجنان

من حور الجنان أم أنت إنسان الكمال
أم أنت الملاك جيت تورى الناس الجمال
سبحان من نشاك حسنة وفى غاية الكمال
يهواك الجنوب وإليك ينقاد الشمال
ما أظن يحصوا حسنك لو يحصوا عدد الرمال
بإيه يقدروك يا ملك ملوك عصر الجمال
سلطان بهجتك محروس بجيوش الجلال
ويغار من صفا حسنك صفاء ماء الزلال
فى مراية خدودك أشوف تأكيد سحر الحلال
وأشوف فى سماء حسنك كل يوم يسطع هلال
يا خلاصة المعانى الصار معناك موضع مثال
فوق المحصنات حائر لطف وكرم خصال
آلهة الجمال يعترفوا ليك ما ليك مثال
تتمنى البدور تقبيل يداك فى إمتثال
يا طايل الوريد يا أهيف يا اللى خصمه زال
فيك منظر يحنن وفيك منظر فارس النزال
ليك من الغزالة جبين وقاد وعيون غزال
والحور من مناصبها لى قدرك تكتب نزال
صفاء ماء الجمال فى مجال جمالك راق وجال
زى ماء الحياء فى عيون ربات الحجال
ما فعل السلاح تفعل عيناك النجال
مكسور الطريف كسر قلوب الرجال
شاركت الغمام والموج مناظر وإرتحال
شاركت الظبا فى نفرتن والإكتحال
شاركت القلوب فى موضعن على كل حال
تفداك النفوس وفدى النفوس كان المحال